ឧបសគ្គជាច្រើនដែលខ្ញុំបានជួបប្រទះ នឹងឆ្លងកាត់កន្លងមក ប្រៀបបានទៅនឹងគ្រូបង្រៀនដ៏មានជំនាញម្នាក់ មកបណ្ដុះបណ្ដាលខ្ញុំយ៉ាងយកចិត្ដទុកដាក់បំផុត។ ខ្ញុំជាកូនកសិករម្នាក់ ធ្វើស្រែនៅរដូវទឹកស្រក ហើយក្នុងការធ្វើស្រែនោះ ខ្ញុំក៏ឆ្លៀតផងដែរ ទៅរកត្រីដើម្បីរកប្រាក់ចំណូលខ្លះមកផ្គត់ផ្គង់គ្រួសារ។ នេះ គឺជាទម្លាប់ទៅហើយ សម្រាប់គ្រួសារខ្ញុំ ដែលធ្វើរបៀបនេះជាដដែលៗ និងពីមួយឆ្នាំទៅមួយឆ្នាំ។
ខ្ញុំឈ្មោះ អឿ ស៊ីណា មានអាយុ២៩ បច្ចុប្បន្ន មានតួនាទីជាអ្នកនិពន្ធជាន់ខ្ពស់ បម្រើការនៅក្នុងគ្រឹះស្ថានបោះពុម្ព នៃសាកលវិទ្យាល័យ ម៉េងលី ជេ. គួច។ ទម្រាំឈានជើងមកដល់ឈ្មោះជាអ្នកនិពន្ធនេះ ខ្ញុំបានឆ្លងនូវរឿងហេតុជាច្រើន តួយ៉ាងទាំងការសិក្សា និងការធ្វើការងារជាបន្ដបន្ទាប់។ ខ្ញុំជាសិស្សម្នាក់ដែលមានសំណាងក៏អាចថាបាន ក្នុងមួយវិទ្យាល័យប្រពៃគិរី ក្នុងស្រុកជលគិរី ជំនាន់ខ្ញុំរៀននោះ ខ្ញុំបានជាប់អាហារូបករណ៍អត្ថិភាពពិសេស ដែលហៅអក្សរកាត់ថា (SPS) នៅសាលាភូមិន្ទភ្នំពេញ ក្នុងជំនាញអក្សរសាស្រ្ដខ្មែរ ក្នុងនោះដែរ ខ្ញុំទទួលបានប្រាក់ឧបត្ថម្ភមួយខែ៧០ដុល្លារ ដែលមានការគាំទ្រពីធនាគារពិភពលោក សហការជាមួយរដ្ឋាភិបាល។
ក្នុងអំឡុងពេលសិក្សានោះដែរ ខ្ញុំបានសិក្សាបណ្ដើរ និងឆ្លៀតធ្វើការពេលយប់បណ្ដើរ ដែលការងារនោះ គឺជាអ្នករត់តុ បានកម្រៃត្រឹមតែ៣០ដុល្លារប៉ុនណោះក្នុងមួយខែៗ ខ្ញុំធ្វើការងារនេះ រយៈមួយឆ្នាំកន្លះ បន្ទាប់មកមិត្ដភក្ដិខ្ញុំ បានហៅខ្ញុំទៅធ្វើការងារជាមួយគាត់ គឺធ្វើការងារជាអ្នកកត់មុខម្ហូបជូនភ្ញៀវ នឹងចាក់បទចម្រៀងនៅពេលយប់ ខ្ញុំធ្វើការងារបានកន្លះឆ្នាំ ក៏បានដាក់ពាក្យធ្វើការងារជាអ្នកព័ត៌មាននៅស្ថានីយ៍ទូរទស្សន៍ CTV8HD រយៈពេលជិតមួយឆ្នាំក្នុងឆ្នាំ២០១៥ ខណៈនោះខ្ញុំកំពុងសិក្សាបរិញ្ញាបត្រឆ្នាំទី៤ ជិតនឹងចប់ល្មម។ លុះពេលខ្ញុំរៀនចប់ ខ្ញុំត្រូវបានមិត្ដភក្ដិដែលរៀនជាមួយគ្នានៅបរិញ្ញាបត្រអក្សរសាស្រ្ដខ្មែរម្នាក់បានហៅខ្ញុំឱ្យដាក់ប្រវត្ដិរូបចូលធ្វើការងារជាអ្នកវាយអត្ថបទនៅ សាលារៀន អន្ដរទ្វីប អាមេរិកាំង។
ខ្ញុំបានធ្វើការងារជាអ្នកវាយអត្ថបទភាសាខ្មែរ នៅការិយាល័យលោកឧកញ៉ា វេជ្ជបណ្ឌិត គួច ម៉េងលី ស្ថាបនិក ប្រធានក្រុមប្រឹក្សាភិបាល និងអគ្គនាយកប្រតិបត្ដិ នៃក្រុមហ៊ុន ម៉េងលី ជេ. គួច អេឌ្យូខេសិន ដែលមានមជ្ឈមណ្ឌលភាសា អេ អាយ អាយ និងសាលារៀន អន្តរទ្វីប អាមេរិកាំង ជាបុត្រសម្ពន្ធ។ ខ្ញុំធ្វើការងារជាអ្នកវាយអត្ថបទនេះអស់រយៈពេលជាង២ឆ្នាំ។ ដោយសារមើលឃើញពីសមត្ថភាពរបស់ខ្ញុំ ទើបលោកឧកញ៉ា វេជ្ជបណ្ឌិត គួច ម៉េងលី ដំឡើងតួនាទីខ្ញុំពីអ្នកវាយអត្ថបទ ទៅជាអ្នកនិពន្ធ។ លុះក្រោយមកទៀត លោកឧកញ៉ា វេជ្ជបណ្ឌិត បានដំឡើងពីអ្នកនិពន្ធ ទៅជាអ្នកនិពន្ធជាន់ខ្ពស់ នៃគ្រឹះស្ថានបោះពុម្ពនៃសាកលវិទ្យាល័យ ម៉េងលី ជេ. គួច ដដែល។
ស្នាដៃដែលខ្ញុំបាននិពន្ធ និងរៀបរៀងទាំងនោះរួមមាន៖
ក.ស្នាដៃរៀបរៀង
១. សៀវភៅ គំនិតរកស៊ី គួច ម៉េងលី
២. សៀវភៅ កម្រងកំណាព្យពីដួងចិត្ត
ខ.ស្នាដៃនិពន្ធរួមមាន
១. សៀវភៅ កម្រងកំណាព្យ វេជ្ជបណ្ឌិត គួច ម៉េងលី និងខ្ញុំ
២. សៀវភៅកម្រងរឿងខ្លី ឧកញ៉ាវេជ្ជបណ្ឌិត គួច ម៉េងលី និមិត្ដរូបខ្ញុំ (ស្នាដៃនិពន្ធរួមក្រុមការងារ)
២. សៀវភៅ គតិបណ្ឌិត គួច ម៉េងលី (គ្រោងនឹងចេញឆាប់ៗនេះ)
៣. សៀវភៅ បេះដូងពុក (គ្រោងនឹងចេញឆាប់ៗនេះ)
No comments:
Post a Comment